Fushata e ndërgjegjësimit mbi programet e NATO-s për nxitjen e inovacionit në Siguri dhe Mbrojtje

Qendra e Inovacionit të Sigurisë dhe Mbrojtjes ka ndërmarrë iniciativën për rritjen e ndërgjegjësimit mbi programet e NATO-s, të cilat mbështesin kërkimin dhe zhvillimin në fushën e sigurisë dhe mbrojtjes. Ky projekt synon angazhimin aktiv të institucioneve të arsimit të lartë, kërkuesve shkencorë dhe inovatorëve të rinj, duke ofruar informacion të detajuar mbi mundësitë e financimit dhe bashkëpunimit ndërkombëtar.

Në qendër të këtij informimi janë dy shtylla kryesore të aleancës:

• Science for Peace and Security (SPS): Një mekanizëm që mundëson bashkëpunimin ndërkombëtar përmes projekteve kërkimore shkencore, me fokus adresimin e sfidave bashkëkohore të sigurisë.

• DIANA (Defense Innovation Accelerator for the North Atlantic): Një platformë akselerimi që synon zhvillimin e teknologjive me përdorim të dyfishtë (civil dhe ushtarak), duke krijuar një urë lidhëse mes akademisë, industrisë dhe sektorit të mbrojtjes.

Cikli i takimeve nisi në ambientet e Tirana Business University, ku studentë dhe anëtarë të personelit akademik të fakultetit të Teknologjisë së Informacionit morën pjesë në një dialog ndërveprues. Gjatë këtij aktiviteti u theksua rëndësia e kontributit akademik në ekosistemin e inovacionit dhe roli kritik i teknologjisë në arkitekturën e sigurisë moderne.